الردحي والرداحات

من طرف **وسام الطيب** الأحد يناير 09, 2011 7:54 pm

الرَدَحِى ) لمن لا يعرفونه هو طريقة من الطرق (الكثيرة) التى تستخدمها (النسوان) فى حروبهن و نزاعاتهن .. وهى طريقة تعتمد أساساً على إستخدام فنون اللغة من سجع و طباق و مقابلة لإعطاء الكلمات معنىً أكثر قوة ...... و هذه الكلمات بدورها منتقاة بعناية من قِبل (الرادحة) لتؤكد علو مكانتها أو لِتحط من قدر رادحة أخرى ...وهو ما يجعله ضرباً من ضروب الفنون تشتهر به الرادحات و يتميزن به عن باقى (النسوان) ال( بجم) اللآتى لا يستطعن الدفاع عن أنفسهن ...

و أذكر فيما أذكر قديماً أنه كانت تسكن فى حىّ قريب من حيّنا رادحة من فطاحل الرادحات .. و فوق كونها كذلك فقد كانت كثيرة الجثة سميكة الجلد وافرة اللحم كثيفة العظم واسعة الحلقوم كبيرة البلعوم لها جنازير صوتية بدلاً من الحبال الصوتية .. كانت هذه المرأة (فتوة) النساء فى ذلك الحى فكثيراً ما يلجأن لها لتأخذ بثأرهن .. بيد أنها كثيراً ما تنفجر إذا شاغلتها إحداهن بكبر حجمها ف(تغُز) إحدى يديها فى وسطها والأخرى ملوحةً بالمفراكة فتردح مفتخرةً :

ما تقيفى فى الزلط و تتكلمى غلط
.. نحن نححححححححححححححمد الله الغدا ضأن.. و التحلية برتكان...
...العشا حمام و التحلية شمّام .....و مليانيييييييييييين يا إنتى ...
....لا كوع يقد الوسادة لا ساق يضبح الجدادة ...نحن تربية بيت و فرش موكيت....

....هيييييههههيييييييييى....
.... حليلكم إنتو يا ناس الإشلاق يا الما سمعتو بى السيريلاك ....
....نببببببببرة و نستبرة و ما نسكن جبرة...
...بششششششتنة و الناس متمحنة ...
..أوع من كدا و الدنيا شتا ...
.هيييييييييييييييييييييييى ...
لا كرعيننا رقاق و لا مولودين فى زقاق ..
أولاد عوااااااااايل و عندنا فايل ....
ولدونا فى الإمتداد و حبّينا فى البلاط ..
.نححححححححححححمدو..... البنريدو بنولع ليو اللمبة.. و الما بنريدو بنحرش ليو الكلبة !!
.. عشان كدا أعملى لاين و أقيفى بهايند.... و أفهميها... أعملى شخيط و اقيفى بعيد ..
سجم و كمان عدم فهم ؟!!
...هييييييييييييييييى و تااانى هييييييييييييى و تانى و تانى هيييييييييييييييييى....
ما تكبى الريحة و تعملى تفتيحة و تخلينا نقيف ليك فى طرف المعلقة و نوريك ا .....
كان جبل طلعناو و كان عسل لحسناو ..

.هووووووووووووى.... تنبزينى أنا يا كرور يا وسخ الخور !!
.. يا تربيزة الجزارة يا اللامّة الوسخ و الزفارة !!
بطااااااااطس و مستوى غااااااتس ....

هييييييييييييييييييى
أخير ليييييك فتحى عينك قدر الريال و خلّى أضانك قدر العقال ...
ما تخلينى أدق الصفايح و أطلع الفضايح
... يا مرة يا مجنونة يا شبه حجر الطاحونة ...يا ليمونة و عاملة فرعونة !!!
... هيييييهييييييييييييييييييييييي ....
غادى غادى الجزام بعادى .
.. يا الككوية يا أم جضوماً موية
...الشمس ضربتك و الرجال أبتك !!!!!

لا حولا و لا قوة الا بالله ...!!!!
الشي شنو آبت الطيب ..؟؟!!
الولية دي بالعة رادي و لا شنو ..؟؟!!
الخرابة نفسها ساكت ما بيقوم ..؟؟!!

الله يحفظ خلقو و عبادو ...!!

من طرف **Aymen Mirghani** الثلاثاء يناير 11, 2011 5:59 pm

مافى كلاااااام...
بس الله مايخليها تزعل اكتر من كدة..
بتجيب بلاوى.....!!

من طرف **khalid naeem** الخميس يناير 13, 2011 3:27 am

ياخى دى مبالغة الله لايلمنه بيها

اتخيلت نفسى اتقرنت معايا

والله اتاري جارتنا كانت رداحة واحنا ما عارفين ليها اسم ولا صفة ... جاءت تزورنا اول ما رحلنا لمنطقة الشجرة ولقت عبدالله ومدثر بركبوا في الاريال بتاع التلفزيون (الزمن داك مافي دش ) غزت كوعه زي رداحة وسام دي وقالت : البوبار وفك الزرار وغز الاريل في بيت الايجار !!!

كنت فاكر انه نوع الحريم ده انقرض بس لما شفت جيل الثمانينات تناول الموضوع عرفته انه تواصل الاجيال زي البقولوا في نجوم الغد

زمااااااان كانت الاحياء بتتعرف بالنسوان طويلات اللسان وقليلات الاحسان

وكثيرا ما اقترن اسم الشارع باسم رادحه من الرادحات

الله يكون فى العون

الردحي والرداحات

الردحي والرداحات

رد: الردحي والرداحات

رد: الردحي والرداحات

رد

رد: الردحي والرداحات

رد: الردحي والرداحات