بيني ما بينك تصافي ..

بيني ما بينك تصافي

أنَا بينِي مَا بينِك تَصَافِي ..
و ألف نَفَّاجْ مِن مودَّة
و كَم مِسَاحَات مِن تَعَافِي ..
بينِي ما بينِك مَحَنَّة ..
و كم يفِيضْ حُسْن المَظَنَّة
و كم دهُور إخْلاص تَوَافِي ..
***
بينِي ما بينِك مَدَائن ..
و كم حِلِم شَاخِص يَعَايِن ..
لي أمَل بَاكِر يَفَرْهِد ..
و يَبْقَي زي شَمسْ الله بَائن ..
يَبْقي لي أرواحنا بَلْسَم ..
و لي وَجَعْ فُرقَتْنَا شَافِي ..
***
بيني ما بينِك تَمَنِّي ..
و كَمْ نَغَم بالشوق يَغَنِّي ..
و كَم حَنِين وَاقِف قُصَادِك ..
جاي يَشْكِي إليك بُعَادِك ..
و مِنِّو كَمْ نيرَان كَوَنِّي ..
و كَم فِي ليل كَمَّل سَوَادُو
قَبْل فِيك يَكْمَل طَوَافِي ..
***
بينِي ما بينِك أمَانِي ...
فِي حِلِمْ بَاكِر تَحَقَق
وُ جَانا شَايِل للتَهَانِي ..
فِي بَلابِل تَمْلأ دَارنَا ..
تَشْجِينَا بيْ أروَعْ أغَانِي ..
فِي أمَل أصْبَح حَقِيقَة ..
فِي عِهُود ظَلَّتْ رَفِيقَة ..
و أزْهَرَتْ أجْمَل قَوَافِي ..
***
بينِي بين عينيك مِسَاحَة ..
ما تَمِدْ شَمْس الله نُورها
و قَدْرِ مَا فَرَدَتْ صَبَاحا ..
وُ قَدْر مَا تهَاجِر طِيُورُو ..
فِي كُلْ مَكَان مُطْلَق سَرَاحَا ..
بينِي بين عينيك مَوَدَّة ..
و ألف مَعْنَي وُ ألفِ مَبْدَأ ..
و كيف فُصُول الريد بِتَبْدَأ ..
فَكَم بِقَت عينيك مَرَافِئ ..
***
انا بينِي ما بينِك تَصَافِي ..
و كَمْ دُهُور إخْلَاص تَوَافِي ..