زول سوداني .... وعادي جدا

الساعة كم ما مهم بس اللهم اني صحيت ومنو القال انه الصباح واحد عند الناس في ناس ليلهم وصباحهم واحد وغيرهم صباحهم عافية وممكن واحد يلاقي الصباح بعد ان ظل يردد نجمة نجمة الليل اعده

ولما كانت الحياة مجازفة فعليك ان تملأ دواخلك ايمانا وتتوكل تقول بسم الله فربما لن تجد السفنجة او شبب البلاستيك لظرف لا تعلمه ولن تتسرع فى سب من حمله من تحت السرير فربما يكون الكديس الذى لم يجد من يشاركه حياته فوجد فى النعال خليلا

وبعده تمضى نحو الحمام لتجد ان الماسورة تغطي في سبات عميقا وتستشف ذلك من صوت شخيرها الذى يزعج المارة من امام البيت

تعود ادراجك حزينا كئيبا وهذه البداية ليبدأ تفكيرا جديا فى عطلة هذا اليوم وهي اصلا ما فارقة حاجة مشيت ولا ما مشيت واحد يعني الحيحصل شنو؟؟؟ ما كل يوم بنمشي وياهو نفس الحال الفطور والشاي والونسة وكان خلاص في جديد بكون فى شغل !!!

بس المشكلة الجرائد الم فيها كيف ؟؟؟؟

ياربي امشي ولا ما امشي سؤال تحسمه نقرات متسارعة ومزعجة على باب الشارع يهرع نحو الباب ليجد شابة يقف برهة ليستبين معالمها هل حقيقة التى امامه شابة وما الذى حدث بوجهها فجعله يابس جاف متشقق فى ناحية ومتورد فى اخرى وبينهما عوالم وتضاريس وما ان يستفيق من شروده الا تصعقه الشابة بايصال مالى رسم شهري للمياه

فيرد بالله عليك انت ما بتخافي الله

ليه ؟؟

ده وقت تجي فيه تقول جاي شايله خبر !!!

بعدين ذاتو نحن ما عندنا موية ندفع لي شنو

والله تاني تجي تدقي الباب ده الا اوريك نجوم الليل بالضهر

امشي من هنا يلعن ابو اخلاقكم

يسرع الخطي الى الداخل ليجد عدد من المكالمات لم يرد عليها

فيعود لاولها فيجد ان المتصل به قد اخطأ فى الرقم

وقد نفذ رصيده

خلاص كملت لا موية ولا رصيد

ده يوم شنو ده ؟؟؟

يعود للمربع الاول فيسحب البطانية ويرمي بجسده على السرير

ملعون ابوك حالة ...

احسن من حتتي دي ما اتحرك

مرفود مرفود شنو يعني

المرتب الما بكفي حق الرصيد شن طعمه

الناس دي تشفوك ماشي الشغل وجاي من الشغل

وانت تعتذر والله مع الشغل الما بنتهى ده

وفى قرارة نفسك تكون مقتنع انك مخدوع وخادع الناس

الشغل عندنا هظار ومجاملة

بس المهم في مرتب

والله اخير لي نومة من كلامات الشمار بتاعت ناس المكتب

مالي ومال ديك طلقوها وديك عندها مشاكل مع حماته وراجله قالوا طلع عاطل ويقول مغترب

والمدير لقوه معرس فوق مرته وعنده بيت تاني

والله صحي المكتب زي سوق الخدار كله خبارات وقوالا

الليلة اخش النت واشوف لي وظيفة ان شاءالله كان فى دبي بمش

مالكم مستغربين دبي دي قالوا كلها هنود

احسن ذاتو لا تفهم لا يفهموك

والله الليلة الا احددها مع النت

وبعد جهد وعناء وجد ما يناسبه من وظيفة

للحديث بقية

يتبع

اللهم اعنا واعن الشعب السودانى والموظف السودانى وارحمنا برحييييييييييييييييييييييم يحس بنا وراع يراعنا بكتاب الله وسنه نبينا

شكرا على المرور ابن خالى والاخت انتصار

وربنا يلهمنا الصبر الجميل