السمع يكلم الما سمع ...

تخيل كيف يكون الحال لو ما كنت سوداني




· كنت ح تلتزم بالمواعيد

· كنت ح تدفع فاتورة المحامي أوالطبيب قريبك

· كنت قاضيت المهندس اللي خرب ليك بيتك

· كنت عملت مشروعك بنفسك دون محاكاة

· كنت بدأت دوامك في الموعد المحدد - كنت حتنطق حرف ال (ق ) و ال (غ) كما ينبغي وما كنت حا تقول للتسعة تزعة

· كنت صرت متخصص وعالم في مجالك

· كنت حتلبس شيك جدا عند خروجك أمام التلفاز وأجهزة الاعلام

· كنت تتحدث بطلاقة وإنسيابية بدون أ أ أ أ أ أ

· ولو ما كنت سودانى كنت عرفت أن باللدقيقة 60 ثانية وبالساعة 60 دقيقة وباليوم 24 ساعة وفي اليوم ممكن تعمل كذا وتنجز كذا وكنت خططت لحياتك ومستقبلك و كنت اخترت المساق التعليمي بنفسك ودرست الجامعة بالكلية اللي تناسب مقدراتك ومواهبك ورغباتك المستقبلية مش عشان ود جيرانكم اختار الكلية دى بالذات يعنى اخنق فطس.

· كنت ح تتصل بالتلفون قبل زيارة أحد في منزله بدري شويه، مش و أنت في خشم الباب، ده طبعا لو اتصلت وما جيت داخل زي قدر الله بدون حتي ماتدق الباب، وتدقو ليه؟؟مش في سلك تجرو وتدخل!!بدون مراعاة لحرمة البيت

· ولو ما كنت سوداني...كنت انتظرت دورك في الصف وخلصت معاملتك بنظام بدل الململة البتعملوها وكنت ح تنهر أولادك لما يبهدلوا ليهم بيت زول ويعيثوا فيهو فسادا وحضرتك قاعد تضحك ومتعوجب لي اولادك ورافع لي ناس البيت الضغط والسكري...

· كنت حا تتوقع بحصل شنو لما ترقد طفلك الصغير بدون بامبرز في سرير في بيت ناس!! واولادك الاكبر شوية بعملو شنو في نباتات وازهار الناس التعبانين عليها وزارعنها وراوينها بي دم قلبهم ..والطامة الكبري لو كان عندهم حوض سمك .

· و كنت ح تتردد في أخذهم معاك المرة الجاية لنفس البيت، علشان يبهدلوه مرة تانية..

· كنت ح تتردد في إعطاء رقم تلفون أو عنوان شخص ما.. دون إذنه أو حتي سؤاله إنكان عندو رغبة يتواصل مع الناس ديل أو مفهمهم انو ما عندوا تلفون من اصلو بدل تورطو وتحرجو كدة!!!.وكنت امتنعت عن السماح بجلوس طفلك الرضيع في المقعد الأمامي على حجر والده او والدته ولمن يحصل حادث . . الحبيب ياكلها لا لذنب جناهو سوي انو اهلو سودانين!!.

· كنت ح تترد في زيارة شخص ما.. أنصاص الليالي و صابح تاني يوم مدارس و عمل وتساهر بالناس وتطلع روحهم تشرب العصير والشاي ويعملو ليك العشاء علي امل انك تمشي وتخليهم ينومو وانت برضو قاعد تبرأ فيهم وما تحس الإ قبل آذان الفجر بشوية وتقوم تنكشح بعد ما الديك قرب يعوعي!!

· ولو ما كنت سوداني ...كنت ح تخلي الصغار في البيت عندما تكون المناسبة مناسبة كبار..- كنت اتونست بصوت معقول، خصوصاً عندما يكون الطرف الأخر قاعد جنبك في نفس الكنبة.. ويا حبذا عندما يكون الطرف الاخر ساكت...كنت امتنعت عن التدخين في منزل شخص آخر، او على الاقل استأذنت قبل ما تولع

· كنت ترددت في ارسال حاجات وزنها خمسة كيلو وما فوق مع كل من تسمع بأنه ماشي السودان...كنت رجعت القروش الاستلفتها في وقتها, أو في الحقيقة رجعتها و بس.

· كنت امتنعت عن زيارة احدهم في مكتبه، للونسة او مناقشة امور لا صلة لها بالعمل

· كنت خجلت من عدد المسكولات التي تعملها، مش كمان تقول 'شنو يا فردة, خمسه مسكولات ما ترد عليها؟ والله الفيك اتعرفت'..

· كنت حا تقعد فى صالون الناس بدل تلوص فى البيت كلو.

· كنت ح تبطل التحشر فى خصوصيات الناس وتعمل الحالة واحدة وتدى نفسك الحق تسأل اى سؤال يخطر فى مخك ( لو كان فى يعنى)

· كنت ما حا تمشي مستشفى الولادة وتقعد تحقن النسوان الفى العنبر كلهم واللللللللللله عيب كبير يا سودانيين اصلا ما شفت غيركم بتحاوم فى عنابر الولادة وكمان معاها هرجلة وإزعاج ..اصلا انتو البوديكم شنو مستشفي الولادة؟؟ عشان تودو نسوانكم اوكي آمنّا بالله طيب اقعدوا في الاستقبال لزومو شنو الحوامة في العنابر يعني حبكت تباركو للام .. استنو لمن تطلع في البيت أما لو كانت اختك او زوجة اخوك يا ريت الزيارة تكون من طرف الاوضة وتتوكل علي الله ..

· ولو ما كنت سودانى كنت بطلت تطلع بالعراقى والسروال والسفنجة وراسك مكشوف وصوتك يجيب الطاش.

· لو ما كنت سودانى ما كنت اكلت ميراث اخوانك الصغار واستوليت على بيت ابوك لى يوم يبعثون عشان بس انت الكبير!!



· ولو ما كنت سودانى كنت إبتكرت فى خريطة بيتك بدل تشف حقت صاحبك بالكربون وكنت استثمرت فى حاجة غير الركشة !! ومحلات الاتصالات !!

· ولو ما كنت سودانى كنت عرفت وين ترمي السفة وكيف تتخلص من الأكياس والأوراق والنفايات،

· ولو ما كنت سوداني كنت عرفت تسوق سيارتك في خط مستقيم،

· ولوما كنت سوداني كنت قدرت تجعل من السودان بلد بيهو نعتز،

· ولو ما كنت سودااااااااااانى ما كنت سقت معاك كتيبة وانت ماشى المطار وما كنت عملت الضوضاء والغوغاء العجيبة البتعملوها فى المطارات ولابسين الجلاليب والبراطيش وراسكم كاشف وفي احسن الاحوال لابسين طاقية ويوم تحبو تقشرو تلبسو مركوب نمر يقزز .. ونسوانكم معنكشين بى دهب البيت كلو ولابسين الاحمر والاخضر والترتر وزفة الوان ما شوفناها حتي في اعتي صحن سلطة ده غير شباشب الظار البرتقالي والليموني وهلمجرا وشفعكم يكوركو ويتساككو ده غير التحنيس والدناءة عشان يمشو ليك الوزن !!!

· ولو ما كنتو سودانين كنت قعدتو محترمين فى الطيارة وما قرفتو المضيفات بي الطلبات والاصوات والمشية والجية والهمجية وبكاء الشفع والشنط والكراتين والصفايح الداخلين بيها الطيارة والاصوات العالية والجلاليب الشربانة وما كان نسوانكم غيرو التياب فى الطيارة وما كنتو فكيتو الاحزمة ووقفتو قبل الطيارة تنزل..

· لو ما كنت سودانى ما كان ممكن تدخل فى زول شمال وتقول ليهو راتبك كم؟؟؟؟

· ولو ما كنت سودانى ما كان ممكن تفكر انك تمشى عرس بتاع ناس وتقيف بكل بجاحة تصور العروس بى موبايلك وانت ما بتقرب للعروس ولا حتى بى حواء وآدم بدون ما تسأل نفسك منو الاداك الحق ده في إختراق خصوصيات الناس ومنو السمح ليك تدخل وتتعشي وتصور!!!! .

· ولو ما كنت سودانى ما كنت طلعت من شغلك ولمدة ثلاثة ايام وسبت المراجعين يتبهدلو عشان حبوبة جار جاركم ماتت عن عمر يناهز المية وشوية والبكا جاى خبر من الشمالية.. والمراجعين برضو لو ما كانو سودانيين ما كان سكتو عن حقهم وكل يوم يمشو ويجو المؤسسة عشان موضوع تافه ما بياخد اكتر من عشرة دقايق!!!

· لو ما كنت سودانى كنت استفدت من غربتك وأمنت مستقبل اولادك وقدمت استقالتك ورجعت بلدك بي كرعينك مش بالصندوق..

· لو ما كنت سودانى ما كان كل يوم جاييك تلفون رسل وجيب وحول عشان هم يقعدوا ياكلو فى حقك لا شغل لا مشغلة ويشتغلو ليه؟؟كفاية عندهم سودانى مغفل زيهم يرسل بدون تفكير ..

· ولو ما كنت سودانى مستحيييييييييييييييل تدى اخوك يبنى ليك بيتك وترجع بعد خمسة سنين تلقاو لسة ما حفر الساس ولو سألتو عن القروش الحولتها طول السنين دي يزعل منك ويخاصمك ويعملها حكاية طويلة وعريضة ولو ما كانو اهلك زااااتهم سودانييين ما كان غلطوك وطلعوك انت الكعب!!وجبروك تسكت عن حقك وطلعت من الموضوع بي ازمة نفسية!!

· صدقنى لو ما كنت سودانى كانت حياتك مشت بى اريحية ونظام ورااااااااحة كانت مجاملاتك حا تكون حلوة وفى حدود المعقول بدل كل يوم جاري ولاهث من بيت لي بيت في الفارغة والمليانة!!.

· كنت نمت لما تحب وتصحى لمن تحب..كنت انت القررت مشروع زواجك بمن تحب بدل القبيلة كلها تقرر معاك..ويجزمو بأغلظ الإيمان انو فلانة هي البتناسبك !!!عرفو احتياجاتك كيف؟؟ميولك كيف؟؟طلبك كيف؟؟ انا ما عارف!!!!!.

· كنت سميت اولادك الاسماء البتحبها مش البختاروها ليك عمك وجدك ونسيبك وتقوم الدنيا وما تقعد لو ما سميت ليهم الاسم الدايرنو ويسلبوك ويسلبو الام ابسط الحقوق انها تسمي الكائن الكانت شايلاو تسعة شهور وتعبانة فيهو ده!!!

· كنت استمتعت باجازتك وبى وقتك وحياتك بدل كل واحد يديك الفتوي الفى دماغو..لو ما كنت سودانى كنت حا تكون سييييييييييد نفسك وووووووووووووووووووووووووووووووووووووو.



**********************



الرجاء إضافة وجهة نظرك....
بالله اللي عندو اي راي يضيفو من باب الشفافية ورحم الله امرئ عرف قدر نفسه

[تصدقي بعد ده كلو شايفين روحنا احسن ناس والسمح فينا كلو ضربتيبو الدلجه وماقلتىهو
بس برضو موضوعك حلو ياالبنقلاديشيه انشاءالله اكون كتبتها صاح ما تقولى لي كان ما كنتى سودانيه كان بقي عندك املاء

هههههههههههههههههههههههههههههههههههههههههه
و الله عاد ما فضّلتي شي عشان نكتبو ....!!!!! ...... بس برضو كان ما الكلام دا كللللللللو ما كان السودانيين عندهم طعم ....!!! ..

ياخي احبطتينا احباط معقول حياتنا دي كلها غلط .كل من الزول الرسل معاك كيس الويكه ده خلاك تمرقي عيوبنا كلها كده فد مره. والله ده شي كتير خلاس منو العوض وليهو العوض

ههههههههههههههههههههههه والله يامبارك رغم انو الحاجات دي كلها بالجد بتغيييييييييييييظ لكن برضو مافي احلى ولا اجدع ولا اشهم مننا

اذا لم نكون بهذه الصفات فانت تبحثي عن المدينة الفاضلة